June 11th, 2020

मराठी तरुणांना रोहित पवारांनी दिला ‘हा’ फायद्याचा सल्ला

लॉकडाऊन शिथिल झाल्यानंतरही घरात बसून राहिलेल्या राज्यातील तरुणांना भीती झुगारून घराबाहेर पडण्याचं आवाहन आमदार रोहित पवार यांनी केलंय. (Rohit Pawar appeals youth)

मुंबई: ‘लॉकडाऊन शिथिल झाल्यानंतर खासगी क्षेत्रात रोजगाराच्या संधी निर्माण होत आहेत. पण आपल्याकडचे काही तरुण कंपन्यांमध्ये लगेच रुजू व्हायला नकार देत आहेत. कामाच्या बाबतीत आपण अशी कारणं देत बसलो तर आपलं नुकसान होईल. त्यामुळं भीती झुगारून घराबाहेर पडा,’ असा सल्ला राष्ट्रवादी काँग्रेसचे आमदार रोहित पवार यांनी राज्यातील तरुणांना दिला आहे. (Rohit Pawar appeals youth)

लॉकडाऊनच्या काळात अर्थचक्र थांबल्यानं अनेकांचे रोजगार गेले आहेत. आता लॉकडाऊन शिथिल होऊ लागल्यानंतर पुन्हा एकदा संधी निर्माण झाल्या आहेत. मात्र, भीतीपोटी अजूनही अनेक जण घराबाहेर पडायला तयार नाहीत. करोना संपल्यावर किंवा सवडीनं जाऊ अशी काही जणांची भूमिका आहे. रोहित पवार यांनी याबद्दल चिंता व्यक्त केली आहे. ‘योग्य काळजी घेऊन आता घराबाहेर पडावं लागेल. कारण गेल्या दोन-तीन महिन्यात आर्थिक संकटाचा डोंगर दररोज नवनवी उंची गाठतोय. आपण असेच घरात बसून राहिलो तर या संकटाची उंची आणखी वाढेल आणि मग त्यावर मात करणंही कठीण होऊन बसेल,’ असा इशारा रोहित पवार यांनी एका फेसबुक पोस्टच्या माध्यमातून तरुणांना दिला आहे.

‘मुलांनी आता पालकांवर जबाबदारी न टाकता त्यांची काळजी घेऊन आणि स्वतः पुढं येऊन जबाबदारी घ्यायला पाहिजे. कारण वयोमानानुसार शुगर, किडनी, हार्ट, मधुमेह, दमा, रक्तदाब अशा प्रकारचे आजार पालकांना असू शकतात. त्यामुळे अशा पालकांनी तसंच गर्भवती महिला व ५५ वर्षांपुढील नागरिक यांनी स्वतःची काळजी घेऊन मुलांना नोकरीसाठी पाठवणं फायद्याचं होऊ शकतं. पुण्यासारख्या मोठ्या शहराच्या ठिकाणी नोकरीला गेल्यानंतर करोना प्रतिबंधक नियम काटेकोर पाळून पुन्हा घरी जाणं टाळायला पाहिजे, असं रोहित यांनी फेसबुक पोस्टमध्ये म्हटलं आहे.

‘आज खासगी क्षेत्रांत रोजगाराच्या अनेक संधी निर्माण होत आहेत. त्यामुळं कोणत्याही कामाला लहान-मोठं न समजता मिळेल तिथे कामाला सुरुवात करायला पाहिजे. घरात बसून राहिलो तर अडचणी वाढू शकतात. कंपन्यांमध्ये तरुणांना बोलावलं तर ते लगेच कामावर जॉईन होण्यास तयार नसतात. काहीजण सवडीने किंवा दोन महिन्यांनी किंवा कोरोना संपल्यावर जॉईन होऊ असं सांगतात. पण मला वाटतं कामाच्या बाबतीत जर आपण अशी कारणं देत बसलो तर ते आपल्याच नुकसानीचं होईल. म्हणून उलट करोनाच्या भीतीला झुगारून देऊन काम करावं लागेल. मात्र, यापुढं सार्वजनिक जीवनातील आपलं वर्तन, वावर हा अधिक जबाबदारीचा ठेवावा लागणार आहे. नियम आणि शिस्त याची लक्ष्मणरेषा कोणालाही ओलांडता येणार नाही. फेरफटका मारण्यासाठी किंवा सहज चक्कर मारण्यासाठी बाहेर जाण्याच्या सवयीला मुरड घालून अनावश्यक बाहेर पडून गर्दीचा एक भाग होणं टाळावं लागेल. इतरांना आपल्यापासून किंवा आपल्याला इतरांपासून करोनाचा संसर्ग होऊ नये म्हणून काळजी घ्यावी लागणार आहे. त्याऐवजी आपण घाबरून घरात बसलो तर आर्थिक संकटाशी लढतानाच मोडून पडण्याची भीतीही रोहित यांनी व्यक्त केली आहे.

https://maharashtratimes.com/maharashtra/mumbai-news/ncp-mla-rohit-pawar-urges-youth-to-come-out-and-start-work/amp_articleshow/76318608.cms?__twitter_impression=true