October 1st, 2020

हॉटेलला परवानगी; या मागणीचाही विचार व्हावा; रोहित पवारांनी करुन दिली आठवण

राज्य सरकारने पाच ऑक्टोबरपासून हॉटेल सुरू करण्यास परवानगी दिल्याबद्दल राष्ट्रवादीचे आमदार रोहत पवार यांनी महाविकास आघाडीचे आभार व्यक्त केले आहेत. आता सरकारने मंदिर उघडणे आणि जीम सुरू करण्यासंबंधीही विचार करावा,

म.टा. प्रतिनिधी, नगरः राज्य सरकारने पाच ऑक्टोबरपासून हॉटेल सुरू करण्यास परवानगी दिल्याबद्दल राष्ट्रवादीचे आमदार रोहत पवार यांनी महाविकास आघाडीचे आभार व्यक्त केले आहेत. आता सरकारने मंदिर उघडणे आणि जीम सुरू करण्यासंबंधीही विचार करावा, अशी मागणीही त्यांनी केली आहे.

लॉकडाऊनमधून नागरिकांना दिलासा देण्यासाठी पवार यांनी गेल्या काही दिवसांपासून विविध मागण्या राज्य सरकारकडे केल्या आहेत. त्यामध्ये हॉटेल व्यवसाय सुरू करण्यास परवागी द्यावी, मंदिरे उघडावीत, जीम व अभ्यासिका सुरू कराव्यात, जनावरांचे बाजार सुरू करावेत अशा काही मागण्यांचा समावेश आहे.
आता सरकारने पाच ऑक्टोबरपासून काही अटींवर हॉटेल सुरू करण्यास परवानगी दिली आहे. त्याचे स्वागत करताना पवार यांनी म्हटले आहे की, अनेक लोकांचा रोजगार अवलंबून असलेल्या हॉटेल उद्योगाला परवानगी दिल्याबद्दल महाविकास आघाडी सरकारचे आभार. अशाच निर्णयाचा विचार जीम, अभ्यासिका आणि मंदिरांबाबतही व्हावा, ही विनंती. तसेच लोकांनीही मास्क लावून स्वत:ची पर्यायने इतरांची काळी घ्यावी.

पवार यांनी २२ सप्टेंबर रोजी यासंबंधी मागणी केली होती. त्याचाही संदर्भ त्यांनी दिला आहे. त्यांनी म्हटले होते, करोनाबाबत सरकार सर्व प्रयत्न करत असतानाही काहीजण नियमांकडे दुर्लक्ष करतात. पण लोकांची काळजी घेण्याची दक्षता रेस्टॉरंट, जीम, क्लासचालक घेत असतील तर त्यांना परवानगी देण्यास हरकत नाही, असं माझं व्यक्तिगत मत आहे. याबाबत सरकारने योग्य निर्णय घ्यावा, ही विनंती व घेतला जाईल असा विश्वास आहे.

आता जेव्हा हॉटेल उघडण्यास परवागनी देण्यात आली, तेव्हा या मागणीची आठवण करून देत पवार यांनी सरकारचे आभार व्यक्त केले आहेत. तर अन्य मागण्यांची पुन्हा एकदा आठवण करून दिली आहे.

https://maharashtratimes.com/maharashtra/ahmednagar-news/rohit-pawar-seeks-reopening-of-temples-in-maharashtra/articleshow/78426368.cms