October 20th, 2020

तमाशा कलावंताना हवीय शेतकऱ्यांप्रमाणे मदत आणि आरक्षणही

करोना मुळे तमाशा लोककलावंतावर उपासमारीची वेळ आली आहे.

म.टा. प्रतिनिधी, नगर

‘नैसर्गिक अपत्तीमुळे नुकसान झाल्यावर सरकार शेतकऱ्यांना जशी मदत करते तशीच मदत तमाशा कलावंताना मिळावी. फड उभारणीसाठी अनुदान आणि त्यांच्या मुलांना शिक्षणात आरक्षण मिळावे,’ अशी मागणी महाराष्ट्र तमाशा फडमालक व कलावंत विकास महामंडळाचे अध्यक्ष

रघुवीर खेडकर यांनी केली आहे.

आपल्या मागण्यांसाठी तमाशा कलावंतानी कर्जत-जामखेडचे आमदार रोहित पवार यांची भेट घेतली. त्यांच्यासोबत या मागण्यांसंबंधी चर्चा केली. त्यानंतर पत्रकारांशी बोलताना खेडकर यांनी ही माहिती दिली.

खेडकर म्हणाले, ‘तमाशा कलावंतांनी विविध मागण्यांसाठी नारायणगांव येथे एक दिवसांचे लाक्षणिक उपोषण केले होते. यावेळी मागण्यांचे निवेदन राज्याचे सांस्कृतिक मंत्री अमित देशमुख यांना देण्यात आले होते. त्यांनी सकारात्मक विचार करू असे आश्वासन दिले होते. यावर्षी तमाशा व्यवसाय सुरू होण्याच्या सुरुवातीला करोनामुळे लॉकडाउन झाला. त्यामुळे तमाशा मालकांसह कलावंत आणि कामगार आपल्या हक्काच्या रोजगाराला मुकले. सरकारने या काळातला मोबदला द्यावा. शेतकऱ्यांना सरकार जशी मदत करते तशी कालावंतानाही करावी. कलावंतांना विमा संरक्षण, आरोग्य कवच, राष्ट्रीयकृत बँकांकडून शासनाच्या हमीवर विनातारण कर्ज उपलब्ध करावे. तमाशा कलावंतांच्या मुलांना शिक्षणात आरक्षण द्यावे. फड उभारणीसाठी अनुदान द्यावे. अशा आमच्या मागण्या आहेत.’

यावेळी महामंडळाचे सचिव मुसाभाई इनामदार, शफीभाई शेख,उपाध्यक्ष राजू बागुल, संघटक तानाजी मुसळे, दीपक जाधव, सल्लागार शिवदास शेटे उपस्थित होते.
आता लॉकडाऊन शिथील होउन ही गोष्टींना परवानगी मिळत आहे. तमाशाला परवानगी मिळाली तरी हा व्यवसाय लगेच सुरू होऊ शकणार नाही. उन्हाळ्यात यात्रांच्या काळातच तमाशाचा हंगाम असतो. शिवाय सध्या फड मालक अडचणी आल्याने त्यांच्याकडे पुन्हा फड उभारण्यासाठी पैसेही नाहीत. ही सर्व जुळवाजुळव करण्यासाठी पैसे लागणार आहेत. त्यामुळे सरकारच्या मदतीशिवाय दुसरा पर्याय नसल्याचे यावेळी सांगण्यात आले. आमदार पवार यांनी यापूर्वीही एकदा या कलावंतांचा प्रश्न सरकारकडे मांडला आहे. आता अनलॉकची प्रक्रिया जोराने सुरू झाल्याने पुन्हा एकदा या कलावंतानी पाठपुरावा सुरू केला आहे. त्यातच शेतकऱ्यांचे उदाहरण देऊन मदतीची मागणी आणि आरक्षणाची मागणीही नव्याने करण्यात आली आहे.

https://maharashtratimes.com/entertainment/entertainment-news/bollywood-news/we-want-help-and-reservation-like-farmers-demand-of-tamasha-meet-mla-rohit-pawar/articleshow/78768519.cms